O Festival Internacional de Curtas de Verín retransmitirase online por vez primeira

• A sexta edición do certamen celébrase entre o 4 e o12 de setembro

Verín, 21 de xuño de 2021.- As curtametraxes que se proxecten dentro da selección oficial a concurso do FIC Vía XIV de Verín poderán visionarse, por vez primeira este ano, en modo online. Grazas a un acordo acadado entre a organización do festival e a plataforma festhome.com, será posible a divulgación en liña do contido oficial do festival.

Deste xeito, segundo sinala Carlos Montero, “agardamos chegar a máis espectadores e non só a aqueles que acudan presencialmente ao Auditorio de Verín, sede física do certamen”. “A idea de complementar as sesións presenciais coa retransmisión online permitirá, sen dúbida, xerar máis audiencia global”, destaca o director do FIC Vía XIV de Verín.

A VI edición do Festival Internacional de Curtas de Verín celebrarase entre o 4 e o 12 de setembro próximos na vila do Támega. Como cada ano, as curtas seleccionadas a concurso divulgaranse baixo catro categorías: Horizontes, Outra Mirada, Fronteira e Nova. O certame de curtas atópase xa plenamente insertado  na axenda cultural de Verín e a vindeira edición, ao igual que aconteceu o ano pasado, desenvolverase baixo un estrito protocolo anti-Covid.